நவ.27.
சென்னையில் வரலாறு காணாத மழை பெய்து வருகிறது. மேலும் மழை தொடரும் என வானிலை ஆய்வு மையம் அறிவித்துள்ளது. இதனையடுத்து மழை நீர் தேங்கி உள்ள பகுதிகளில் இரவில் கொட்டும் மழையில் முதல்வர் மு.க .ஸ்டாலின் நேரில் பார்வையிட்டு ஆய்வு செய்தார்.
சென்னை, தியாகராய நகர், பசுல்லா சாலைப் பகுதியில் கனமழையால் சாலைகளில் தேங்கியுள்ள மழைநீரை முதலமைச்சர் கொட்டும் மழையில் பார்வையிட்டு ஆய்வு செய்து, தேங்கியுள்ள மழைநீரை அகற்றிட துரித நடவடிக்கை மேற்கொள்ளுமாறு அலுவலர்களை அறிவுறுத்தினார்.
சென்னையில், கடந்த 200 ஆண்டுகளில் ஒரே மாதத்தில் 1000 மி.மீ மழை பதிவாவது இதுதான் நான்காவது முறை என்கிறார்கள் வானிலை வல்லுநர்கள். இத்தகைய கடும் மழைப் பொழிவிலும் உயிர்ப்பலிகளைத் தடுத்து; முடிந்தவரை உடமைச்சேதங்களைக் குறைத்து; பாதிப்புகள் விரைந்து நிலைமை கட்டுக்குள் இருப்பதை உறுதிசெய்துள்ளதற்கு முழுமுதற்காரணம், ஓய்வுறக்கமின்றி நாள் முழுதும் கொட்டும் மழையில் பணியாற்றி வரும் மாநகராட்சி, மின்துறை, பொதுப்பணித்துறை, வருவாய்த்துறை, காவல்துறை, உள்ளிட்ட அனைத்துத்துறை அதிகாரிகள்தான்.
அவர்களுக்கு நாம் எத்தனை நன்றி கூறினாலும் போதாது!அடுத்த சில நாட்களுக்கும் மிக அதிக மழை தொடரும் என அறிவிக்கப்பட்டிருப்பதால், மக்கள் பிரதிநிதிகள், அரசு அதிகாரிகள் அனைவரும் நேரம், காலம் பார்க்காது களத்திலேயே இருந்து பணியினைத் தொடர்ந்து மேற்கொள்ளுமாறு கேட்டுக்கொள்கிறேன். உங்களோடு முதலமைச்சராகிய நானும் களத்தில் நிற்கிறேன்; நிற்பேன்! என தனது ட்விட்டர் பதிவில் முதல்வர் குறிப்பிட்டுள்ளார்.
