நவ.5.
உலககோப்பை கிரிக்கெட் தொடர் தற்போது முக்கியமான கட்டத்தை எட்டியுள்ளது. பெங்களூரு சின்னசாமி மைதானத்தில் நடைபெற்ற ஆட்டத்தில் பாகிஸ்தான்- நியூஸிலாந்து அணிகள் மோதின. முதலில் களமிறங்கிய நியூசிலாந்து அணியில் கான்வே 35 ரன் எடுத்தார். ரச்சின் ரவீந்திரா – வில்லியம்சன் ஜோடி சிறப்பாக ஆடியது. இந்த தொடரில் ஏற்கனவே 2 சதங்கள் அடித்துள்ள ரச்சின் ரவீந்திரா இந்த போட்டியிலும் சதமடித்து சச்சினின் சாதனையை முறியடித்தார்.
வில்லியம்சன் 95 ரன்களுக்கும், ரச்சின் ரவீந்திரா 108 ரன்களுக்கும் ஆட்டமிழந்தனர். எனினும் நியூசிலாந்து அணியின் கடைசி வரிசை வீரர்களும் பந்துகளை விளாசினர். அதிரடியாக ஆட்டத்தினால் 50 ஓவர்களில் 6 விக்கெட் இழப்புக்கு நியூசிலாந்து 401 ரன்களை குவித்தது. நியூசிலாந்து தான் வெற்றி பெறும் என ரசிகர்கள் எதிர்பார்த்து இருந்தனர் ஆனால் கிரிக்கெட்டில் எதுவும் நடக்கும் அது இப்போது நடைபெற்றது.
பாகிஸ்தான் அணியில் அப்துல்லா ஷபிக் 4 ரன்களிலேயே பெவிலியன் திரும்ப, பின்னர் களமிறங்கிய கேப்டன் பாபர் அசாம், பஹர் ஸமானுடன் ஜோடி பந்துகளை துவம்சம் செய்தது. சிக்ஸராக விளாசிய பஹர் ஸமான் 63 பந்துகளிலேயே சதமடித்து விட்டார்.
இந்த சமயத்தில் மழை குறுக்கிட்டது. பாகிஸ்தான் அணி 25.3 ஓவரில் 1 விக்கெட் இழப்புக்கு 200 ரன்களை சேர்த்திருந்தபோது மீண்டும் மழை பெய்தது. ஆட்டத்தை தொடர முடியாத நிலை ஏற்பட்ட காரணத்தால், டக்வொர்த் லூயிஸ் முறைபடி வெற்றியாளரை தேர்வு செய்ய முடிவுஎடுக்கப்பட்டது
இதில் 25.3 ஓவரில் எடுத்திருக்கவேண்டிய ரன்களை விட பாகிஸ்தான் அணி 21 ரன்கள் அதிகம் எடுத்த காரணத்தால் அந்த அணி வெற்றிபெற்றதாக அறிவிக்கப்பட்டது. 126 ரன்களை குவித்த பஹர் ஸமான் இந்த போட்டியில் ஆட்டநாயகனாக தேர்வு செய்யப்பட்டார்.
இதில் வென்றதன் மூலம் அரையிறுதி வாய்ப்பை பாகிஸ்தான் பெற்றது. அதே நேரம் இந்த போட்டியில் நியூசிலாந்து அணி தோல்வியை தழுவிய காரணத்தால் பின்னடைவு ஏற்பட்டது. தென்னாபிரிக்க அணி அரையிறுதிக்கு முன்னேறியது. இந்த தோல்வியின் மூலம் தான் ஆடிய இறுதி 4 போட்டிகளில் நியூசிலாந்து அணி தோல்வியைத் தழுவியுள்ளது.
